Tat-a̱pyia̱/Nkhang/Zwat Swak ma̱ng Jhyiung 2023/Ghwut Zariya A̱wukimedia nTyap

This page is a translated version of the page Education/News/November 2023/Tyap Wikimedians Zaria Outreach and the translation is 100% complete.

Ghwut Zariya A̱wukimedia nTyap

Author: Kambai Akau

Mat zi̱ ngeang mbwak nzi̱t na a̱ nat, zi̱ ku si̱ nghwut a̱mgba̱m mi̱ di̱ cat á̱nietjhyuk á̱fai ba̱ ku nwai mak nyia̱ nta̱m a̱nia a̱ni ba̱ nnyia̱ nta̱m Wukimedia nTyap na ma̱ng nta̱m a̱meang jhyang nang Wukideita ma̱ng Wukimedia Komon, ma̱sa̱t ma̱ng nfwuo mba na a̱nyiung di̱ mi̱n saai teang, a̱wot á̱ bu kpaat a̱cyian jhyuk da̱ a̱keang yunuvasi̱ti a̱kya nang á̱ ngyei Zariya a̱ni, mi̱ Si̱tet Ka̱duna, Naijeriya.

Summary: Á̱niettyiet ma̱ng mmanfang mi̱ Yunuvasi̱ti Ahmadu Bello, Zariya, ma̱ng a̱ca̱cet a̱ka̱vwuomyiam hyia̱k ba̱ lyen lyiat di̱n Tyap ji a̱ni ku shyia̱ a̱ja da̱ a̱vwuo a̱tung ghwut tyiet jhyuk nang Sot Á̱nietnta̱m Wukimedia nTyap ji ku jhyi a̱ni ma̱ng á̱kpa̱ndang ta̱m nji ba, Sot Á̱nietnta̱m Wukimedia Naijeriya. Á̱ tyiet á̱niet ba̱ ku bai a̱ni si̱sak nang á̱ khwuk a̱la̱n a̱tyunta̱m Wukipedia a̱wot á̱ si̱ tat mba á̱pyia̱ ka tazwa jhyuk nta̱m Sotbeang Wukimedia ma̱nang Wukipedia, Swánga̱lyiatwuki, Wukideita, ma̱ng Wukimedia Komon a̱ni. A̱mami, á̱ si̱ ka mbyia̱ mba ba̱ nwai yet A̱tyap a̱ni a̱ja. Jat a̱tung ji ja ku yet á̱ mban lyuut Tyap hu a̱zalang mi̱ di̱ nnyia̱ ta̱m ma̱ng nta̱du Sotbeang Wukimedia na a̱wot á̱ kin mkpaat a̱cyian nta̱m jhyuk mi̱ Zariya mat A̱wukimedia nTyap ba meang.

Social Media channels or hashtags:

Sati nyiung a̱zaghyi a̱tsak a̱tung wu mi̱ mmam 7 ma̱ng 8 Zwat Swak 2023, a̱ghyi Sot Á̱nietnjhyuk Wukimedia Naijeriya nang á̱ ngyei Isma'il Atiba a̱ni, ku shyia̱ ma̱ng á̱nietnjhyi a̱tung Wukimedia nTyap ba mi̱ Ka̱duna gu tyiet mba nyian ta̱m ma̱ng nkyangta̱m nang Outreach Dashboard, Event Matrix, ma̱ng kpa̱t nyinyiit shei nkhang di̱ Wukimedia Komon. Ramatu A. Haliru, Pi̱residen A̱cyetaneang Wukimedia Ka̱duna wu, ma̱ng Umar Ibrahim Askira neet mi̱ Sot Á̱nietnta̱m Wukimedians mKpat ji ku mun shyia̱ a̱ja ba yet kap kyang ku naat mbwuot a̱ni da̱ a̱vwuotyiet a̱kya. A̱ghyi Sot Byi̱k A̱lyem Tyap (SBA̱T), A̱tyoli Akila D. Bunggwon, ku ma mbai gu gbi̱ri̱ng á̱nietnjhyi a̱tung ba da̱ a̱kwonu SBA̱T ji a̱wot a̱ si̱ ya mbwuo nkhang ma̱ng a̱mba meang a̱ja.

Mi̱ njhyi nsati ntat (14-15, 21-22, ma̱ng 28-29 Zwat Swak 2023), á̱nietnjhyi a̱tung Sot Á̱nietnjhyuk Wukipedia nTyap ba ku cyiet ki cyiet neet da̱ a̱ka̱vwuo vwuon nat da̱ a̱vwuo a̱tung ka nang ba̱ ku sak dundung ma̱ng a̱gwaklyen a̱ghyang a̱ lyen lyiat Tyap ji a̱ni a̱ nyia̱ ta̱m hu ma̱ng Fakuti nKhap, A̱tyoli Tomwot Ma̱ndoli, mbeang a̱tyunta̱m a̱ghyang da̱ a̱vwuotyiet a̱kya, A̱tyoli Imaniet Ka̱mbai Isuu.

Á̱ ku nang a̱tung ka a̱lyoot ka "TYAP WIKIMEDIANS ZARIA OUTREACH" (di̱n Shong, ka̱ si̱ fa GHWUT ZARIYA A̱WUKIMEDIA NTYAP).

Mi̱ di̱ nyian ta̱m ma̱ng njhyi nsati ntat a̱nia, á̱ si̱ tat á̱nietbai a̱tung ba á̱pyia̱ ka di̱ kyang nang Sotbeang Wukimedia ji, Sot-nta̱m/Sot Á̱nietnta̱m Wukimedia nTyap ji, Wukipedia, Swánga̱lyiatwuki, Wukideita, ma̱ng Wukimedia Komon mun nfa a̱ni, ma̱ng si̱sak nang á̱nietnjhyuk ba na nnyia̱ ta̱m ma̱ng a̱mba ba̱ san lilyem mba hu ku shyia̱ a̱bwonu a̱khwu a̱ni, di̱ nvak lyuut, kwok a̱nwuat, ma̱ng nyinyiit shei nkhang jhyang.

Á̱ ku mbyia̱ á̱nietbai 66 bi̱ri̱ng ma̱ng a̱gwaklyen a̱ghyang (Pi̱rofeso Lushyot Isuu Bama̱yi), a̱ca̱cet á̱niettyiet, á̱nietnta̱m ma̱ng mmanfang da̱ a̱vwuomyiam a̱kya ma̱ng a̱ka̱vwuomyiam hyia̱k na — kang ma̱ng á̱nietnjhyi a̱tung a̱natat, a̱wot a̱mami, á̱ si̱ nshyia̱ si̱ ku swak á̱niet 40 ba̱ ku maai nkhwuk a̱la̱n a̱tyunta̱m Wukipedia mba ka. |Á̱ ku ka nkhwuk si̱ ku swak a̱yaati̱kut 170 di̱ Wukipedia nTyap hu ma̱ng si̱ ku swak [160] di̱ Swánga̱lyiatwuki nTyap ji, ma̱ng njhyuk ghyáng di̱ Wukideita ma̱ng Wukimedia Komon.

Mba á̱nietnjhyuk ba̱ ku nyia̱ ta̱m a̱ swak a̱ni di̱ kuzang sati (a̱sam ma̱ng a̱nap) ba̱ ku san za̱náng T-shirt ma̱ng bung da̱nian ba̱ ka nshyia̱ fuut mban ta̱m mba hu a̱wot di̱ ngaan nsati ntat hu, a̱mgba̱m á̱niet ba ba̱ ku shyia̱ a̱ja a̱ni si̱ nsaai nkwaa̱mbwat a̱wot mba á̱nietnjhyuk ba̱ ku lyiak di̱ jhyuk hu di̱ si̱sa á̱sam ma̱ng á̱nap si̱si̱ nsaai za̱náng mba ji mat a̱lahyia̱ nang ba̱ ku kan a̱ni di̱ myiam mba hu.

Á̱ khwuk sot mi̱ WhatsApp mat á̱ mun konyan a̱ ku shyia̱ a̱ja a̱ni da̱ a̱vwuo a̱tung ka a̱wot á̱ bu nggo mba dundung di̱ nnaat mbwuot na̱ na sii du bai a̱ni.

Mat nghwughwu ma̱ng a̱yaafail a̱meang ma̱ng ta̱m huni, ma̱sa̱kut nyap [a̱ji] a li.