При постапката на фотосинтеза кај растенијата се создаваат шеќери во облик на скроб. Тие шеќери се складираат во леукопластите во клетките и образуваат скробни зрна. За подготовка на овој препарат користен е компир. Со жилет се гребнува од внатрешноста на компирот и се прави тенок размаз врз предметното стакленце. На предметното стакленце се ставаат две капки вода, една средишна поголема и една странична помала капка вода. Се става покровно стакленце кое се спушта покрај страничната капка со вода и под агол од 45° се движи кон средината на предметното стакленце се до моментот кога ќе се спојат двете капки со вода, при што се спушта. На овој начин е подготвен нативниот микроскопски препарат и истиот е спремен за микроскопирање. Кај компирот се сретнуваат прости, полусложени и сложени скробни зрна кои се од ексцентичен тип. Простите скровни зрна имаат само едно средиште (хилум) од каде се образуваат концентричните наслојувања. Сложените скробни зрна имаат повеќе хилуми и кај нив концентичните наслојувања се образуваат засебно. Кај полусложените скробни зрна има повеќе хилуми и таму на почеток концентричните наслојувања се формираат засебно, а потоа почуваат да бидат заеднички за целото скробно зрно. Скробните зрна кај компирот се од ексцентричен тип затоа што хилумот не се наоѓа во средиштето на скробното зрно и е поместен кон некој од краевите.