Врз предметното стакленце се ставаат две капки вода, една средишна поголема и една странична помала капка вода. Се зема листот од перуника. Листот се става околу показалецот на левата рака. Се прави тенок пресек со помош на жилет, а потоа со пинцета и жилет се одвојува епидермисот од листот кој е во облик на тенка и проѕирна ципа. Со помош на пинцета изолираното парче од епидермис се става во средишната капка со вода на предметното стакленце. Потоа, се става покровно стакленце кое се спушта покрај страничната капка со вода и под агол од 45° се движи кон средината на предметното стакленце се до моментот кога ќе се спојат двете капки со вода, при што се спушта. Оваа постапка потребно е да се изведе прецизно затоа што во спротивно ќе се создадат воздушни меурчина кои ќе сметаат при микроскопирањето. На овој начин е подготвен нативниот микроскопски препарат и истиот е спремен за микроскопирање. Епидермисот е изграден од основни епидермални клетки, стомини клетки и влакна. Во видното поле на микроскоп се гледаат основните епидермални клетки и стомите. Стомите кај перуниката се изградени од две стомини клетки со бубреговиден облик.