WikiWomen Erasmus+/GLAM toolkit
GLAM Toolkit
Wikimediaprojekten binne, oan de iene kant, tige ympaktfol foar gallerijen, bibleteken, argiven en musea (GLAMs - galleries, libraries, archives and museums, yn it Ingelsk) foar it dielen fan kennis mei de wrâld, it aktivearjen fan frijwilligers en it ferbetterjen fan digitale feardigens. Oan de oare kant binne der grutte hiaten kwa ynhâld, bygelyks as it oankomt op de represintaasje fan froulju. It WikiWomenprojekt wol dizze gender gap op WIkipedia befjochtsje troch de keppeling mei GLAMs te sykjen en sa de represintaasje fan de kennis dy’t sy sammelje en beheare te fergrutsjen, digitale feardigens om mei Wikipedy te wurkjen te ferbetterjen, en tagelyk de represintaasje fan minderheidstalen online te fergrutsjen.
It doel fan dizze toolkit
GLAMS kinne net allinnich mei Wikimediamienskippen wurkje om harren unike kennis te profilearjen, sy kinne ek de kennis, garre troch de eksperts dêr’t sy mei wurkje, promoatsje. It doel fan dizze toolkit is om GLAMs te stypjen by it opsetten fan in strukturearre programma foar harren promoasje- en útwikselingsprogramma en sa in langduorjende relaasje mei skoallen oan te gean foar de bêste resultaten yn de gearwurking.
Dizze toolkit is bedoeld foar wa’t wurket oan edukative útwikselingsprogramma’s by GLAMs om troch it WikiWomenprojekt yn harren programma op te nimmen harren te helpen studinten yn harren GLAM-omjouwing te ferwolkomjen. Dizze toolkit biedt stúdzjematerialen en in stappeplan mei ferskate mooglikheden en ynbounivo’s.
Is dizze toolkit foar my?
Dizze toolkit is foar elk GLAM ynstitút dat studinten en learlingen yn harren GLAM-kontekst ûntfange wol. De kolleksje fan de GLAM of feardigens fan de outreachfunksjonarissen hoege net alle basisgebieten fan it WikiWomenprojekt te bestriken: kinst dyn eigen ynfalshoeke of beskikbere middels kieze foar dyn rûte nei de skoallen. Minderheidstalen, genderrepresintaasje, ûndersyks- en digitale feardichheden binne allegearre (op harrensels, of kombinearre) mooglike paden om te nimmen. Mear ynfo nedich? Sjoch ús boarnen hjirûnder.
Minderheidstalen
Definysje
De term minderheidstaal ûntstie yn de lêste desennia fan de tweintichste iuw. It brûken derfan is net sûnder kontroverze, om’t it de taal altyd definiearret yn de kontekst fan in mearderheidstaal, en dus yn termen fan machtskwestjes.
De sprekkers fan de taal ûnderskiede harren fan de mearderheidsgroep yn taal en kultuer, en hoewol’t demografyske en machtsinferioriteit meastentiids lykop geane, hoecht de minderheid net perfoarst lytser yn oantal te wêzen. De Ried fan Europa brûkt yn it Hânfêst foar regionale talen of talen fan minderheid (1992) de term ‘regionale of minderheidstaal’ om dy talen te beskermjen, in resultaat fan lang ûnderhanneljen dêr’t út bliken docht dat de brûkte termen fariearje kinne ôfhinklik fan de geopolitike kontekst en de ûnderskate noarmen dy’t tapast wurde om in taal as sadanich te klassifisearjen.
As gefolch dêrfan bestiet der gjin wittenskiplike konsensus oer it brûken fan de term. Yn de measte Europeeske lannen wurde de talen definiearre troch rjochtsdokuminten dy’t in bepaalde foarm fan offisjele stipe betsjutte. It boppeneamde Hânfêst foar regionale talen of talen fan minderheden brûkt de neikommende definysjes:
- "Regionale of minderheidstalen" betsjut talen dy't:
i. tradisjoneel brûkt wurde binnen in bepaald territoarium fan in steat troch ynwenners fan dy steat dy't in groep foarmje dy't numeryk lytser is as de rest fan 'e befolking fan de steat; en
ii. oars binne as de offisjele taal of talen fan dy steat;
it omfettet net de dialekten fan de offisjele taal of talen fan de steat, noch de talen fan migranten;
- "Territoarium dêr’t de regionale of minderheidstaal brûkt wurdt" betsjut it geografyske gebiet dêr’t de neamde taal de wize fan utering is fan in oantal minsken, wêrtroch it rjochtfeardige wurdt om de ferskate beskermjende en promoasjemaatregels út dit Hânfêst ta te passen.
- "Net-territoriale talen" betsjut talen dy't brûkt wurde troch ynwenners fan de steat en dy't oars binne as de taal of talen dy't troch de rest fan de befolking fan de steat brûkt wurde, mar dy't, hoewol se tradisjoneel binnen it territoarium fan de steat brûkt wurde, net oan in spesifyk gebiet dêrfan ta te skriuwen binne.
Wêrom’t it wichtich is minderheidstalen te beskermjen?
Yn it foarste plak binne talen tige ferrikend. In taal is net allinnich in kommunikaasjemiddel, mar faak ek in definiearjend elemint fan identiteit en plak yn de maatskippij. Twad befoarderet it learen fan en kontakt mei oare talen kulturele empaty en befoarderet it kognitive feardichheden. Taallearders fan in (minderheids)taal litte mear wurdearring foar diversiteit en tawijing oan it behâld fan taalkundich erfguod sjen.
Feardichheden en gearwurkjen
Je hoege gjin ekspert yn minderheidstalen of de regionale taal te wêzen om it projekt yn de útwikselingsaktiviteiten ynpasse te kinne. Om’t it fuortsterkjen fan de online posysje fan minderheidstalen lykwols ien fan de kearndoelen fan it projekt is, is it hawwen fan respekt en in iepen hâlding foar de meartalige situaasje yn dyn regio wol in fanselssprekkendheid.
Hast net de ekspertize foar de regionale taal, maar wolst it wol brûke, dan is it in goed idee om in ekspert te finen om dêrby stipe te jaan. Net wis hoe ien te finen? In soad talen hawwe pasjoneare fertsjintwurdigers dy’t helpe wolle. De CLARIN ûndersyksynfrastruktuer foar talen is in moai foarbyld foar in oersjoch fan bydragende ynstituten yn ferskate lannen. of contributing institutes in different countries.
Fansels kin ek ien fan de oare doelstellings fan it projekt (digitale feardigens, ûndersyksfeardigens, gendergelikens) as foarnaamste ynfalshoeke keazen wurde foar de gearwurking mei skoallen.
De Gender Gap
Hoewol’t de online ensyklopedy Wikipedy ien fan de meast populêre ynformaasjeboarnen fan ‘e wrâld is, lijt dy oan in skrinend brek oan represintaasje as it giet om froulju en harren opmerklike prestaasjes. Ut ûndersyk docht bliken dat minder as 20% fan alle biografyen op Wikipedy oer froulju giet. Fan de Wikipedyredakteuren is sawat 15-20% frou. Mar 30% fan de Ingelske Wikipedylêzers is frou, en dy sifers binne noch leger foar froulike lêzers út lannen yn ûntwikkeling.
De foaroardielen dy’t oanwêzich binne yn Wikimediaprojekten kinne gefolgen hawwe bûten it platfoarm, lykas it bestindigjen fan besteande stereotipen, it befoardieljen fan tradisjoneel troch manlju dominearre stânpunten, it útwiskjen of bûtenspul setten fan feministyske perspektiven, en it fuortlitten fan konsepten en ideeën dy’t wichtich binne foar froulju en non-binêre yndividuën. It gebrek oan genderdiversiteit yn Wikimediaprojekten kin in feedbackloop kreëare wêrby’t in gebrek oan froulike lêzers liede kin ta minder froulike bydragers, wat op syn bar resultearret yn minder ynhâld foar en oer froulju. In ûnderfertsjintwurdiging fan froulju yn Wikimediaprojekten set har oer yn minder froulike lieders yn de Wikimediabeweging, dêr’t in gebrek oan relevante froulike rolmodellen de partisipaasje fan froulju fierder ferminderet.
Digitale feardigens, ûndersyksfeardigens, en Wikipedy
Om suksesfol Wikipedyprojekten organisearje te kinnen, is it wichtich dat der op syn minst ien meiwurker is dy’t de basisprinsipen fan Wikipedy leard hat, mar it is net fereaske om in Wikimedia-ekspert te wurden. Dizze toolkit jout de hânfetten foar de basisprinsipes fan Wikipedy lykas it skriuwen, moderearjen en bewurkjen fan artikels. It is lykwols ek oan te rieden om yn de kunde te kommen mei de gedrachskoades op Wikipedy en de Wikimediamienskip. Stel dysels bygelyks foar yn de pleatslike kroech en lear mear oer de minsken efter Wikipedy en hoe’tst mei harren yn kontakt komme kinst.
Educator’s pack
Bisto in edukative-útwikselingskoördinator dy’t it Wikiwomenprogramma yn jim GLAM kontekst ymplemintearje wol? Dizze toolkit begeliedt dy by it brûken fan it lesmateriaal fan it WikiWomenprojekt en de basisbegjinsels fan Wikipedy, en helpe dy om ferskate aktiviteiten te kombinearjen om in eigen útwikselingsprogramma te meitsjen en wis mei Wikipedy te wurkjen wat it skriuwen, moderearjen, redigearjen en bewurkjen fan artikels oanbelanget.
Aktiviteiten
WikiWomenaktiviteiten en gearwurkje mei lokale GLAMs
WikiWomen giet de kommende jierren in soad útdagings oan: it ferlet fan digitale en taalfeardigens, de posysje fan Europa’s lytsere talen en minderheidstalen, de needsaak om meartaligens yn de lesplannen fan de skoallen te yntegrearjen, en it belang fan gendergelikens, net allinnich yn ‘e maatskippij mar ek yn ‘e ynformaasje dêr’t wy tagong ta hawwe.
De generaasjes dy’t hjoed-de-dei grut wurde, binne wend oan it idee dat se alle ynformaasje fan ‘e wrâld hieltyd fia de tillefoan yn ‘e bûse hawwe. Dy oerweldigjende hoemannichte ynformaasje kreëarret lykwols in ferlet oan nije feardichheden dy’t leard wurde moatte: hoe’t je betroubere ynformaasje fine kinne, hoe’t je ynformaasje dy’t je online fûn hawwe ferifiearje kinne, hoe’t je relevante ynformaasje fine kinne en wêr’t je de ynformaasje fine kinne dy’t net digitaal beskikber is. Digitale kompetinsjes binne fan krúsjaal belang foar de kommende generaasjes, net allinnich foar takomstige akademyske karriêres en arbeidsperspektiven, mar ek foar ynformearre boargers dy’t har net maklik misliede litte troch desynformaasje, algemien bekend as ‘fake news’ (nepnijs). It skriuwen fan in Wikipedy-artikel biedt learlingen in geweldige wize fan it learen fan dy feardichheden, troch sawol online as offline boarnen te brûken en sitearjen, en troch sels it proses fan it online publisearjen fan wurk, dat op himsels as boarne fan ynformaasje foar oaren tsjinje sil, te trochrinnen. No’t gegevens fan Wikipedy hieltyd mear yntegrearre wurde yn de digitale helpmiddels dy’t wy brûke, lykas Siri of Google, wurdt it hieltyd wichtiger foar lytsere talen en minderheidstalen om harren oanwêzigens op dy side te fergrutsjen om relevant te bliuwen yn it digitale tiidrek. Gelokkich betsjut it open-sourcekarakter fan WIkipedy dat wy as yndividuele brûkers echte feroarings bewurkmasterje kinne.
Galerijen, biblioteken, argiven en musea foarmje in skat oan ynformaasje en yn minderheidstaalgebieten binne sy bysûnder wichtige bewakers fan it regionale en taalkundige kulturele erfgoed. Der is in enoarm potinsjeel foar ûnderwiis, benammen op it mêd fan ûndersyksfeardichheden en regionale identiteit. De kombinaasje dêrfan mei de doelstelling fan digitale feardichheden út it WikiWomen-projekt kin in fantastyske oplossing wêze foar GLAMs.
Learmateriaal/wurkshopmallen
Link
Wurkje mei Wikipedy
Artikelskriuwen
Moderearje
Bewurkje
Handige boarnen
- Open GLAM and Education: Hoe’t dosinten tinke oer digitale boarnen. Dit rapport presintearret de befinings fan it Open GLAM & Education ûndersyksprojekt dat besiket it belang fan online tools basearre op erfguod, digitalisearre kolleksjes en boarnen foar formeel en net-formeel ûnderwiis yn de EU-lannen ûndersiket.
- Open GLAM and impact: Dizze webinar bepraat de ûnderskate wizen dêr’t wergebrûk fan kultureel erfguod op plakfynt, hoe’t projekten en ynstellings it mjitten fan harren ympakt benaderje, en hoe’t guon fan dy projekten bydrage oan it pleitsjen foar iepen tagong ta kultureel erfguod.
- The WikiMOOC: In nije wize om it bewurkjen fan Wikipedy te learen. Ut de earste befinings fan de earste sesje die bliken dat de WikiMOOC behoarlik suksesfol wie yn it berikken fan ûnderfertsjintwurdige minsken op Wikipedy. Dit leveret in earste bewiis dat MOOCs ynset wurde kinne om diversiteit binnen projekten te befoarderjen.
Project pack
Dit projektpakket is makke om GLAMs en taalynstânsjes te helpen mei in stappeplan om it WikiWomenprogramma struktureel yn de edukative útwikselingsaktiviteiten op te nimmen. Hjir steane ynspirearjende foarbylden en ‘good practices’, tips oer it gearwurkjen mei skoallen en oare GLAMs yn de regio, en de ferskate wizen hoe’t je Wikipedy yn de minderheidstaal brûke kinne yn it bredere netwurk en bydrage kinne oan de online oanwêzigens fan de taal.
GLAM-ynstellings kinne learlingen tagong biede ta harren unike kolleksjes en harren stypje by it ûntwikkeljen fan feardichheden en betrouwen yn it brûken dêrfan as ûndersyksmiddel. Iepenbiere belutsenens sil ek it publyk ynspirearje en ta gearwurking mei harren liede. De Arts Council England jout de neikommende fiif generike learresultaten fan publike belutsenens. It is oan te rieden nei te tinken hokker feroarings je ynspirearje wolle foar’t je in edukative útwikselingsaktiviteit organisearje.
Good practices
Gearwurkjen mei skoallen
Oxford University Museum of Natural History wurket mei de jongerein as ûnderdiel fan harren aktiviteiten op it mêd fan publike belutsenens by it dwaan fan ûndersyk. De edukative aktiviteiten omfetsje stipe foar formele edukaasje op ûnderskate kurrikulumnivo’s en publike aktiviteiten fariearje fan it iepenstellen fan harren boarnen foar ûnôfhinklik gebrûk ta sesjes yn de ynspirearjende romten fan de GLAM.
Oxford University History of Science Museum organisearret stúdzjedagen foar learlingen, lykas de Women in Astronomy stúdzjedei. Dy stúdzjedagen binne sa opset om learlingen te ynspirearjen en ynsjoch te bieden yn it dwaan fan ûndersyk en oare feardichheden binnen de GLAM-kontekst, dy’t mei harren stúdzje te meitsjen hawwe.
Digitale feardichheden by GLAMs
Europeana, it digitale-erfguod-platfoarm fan Europa, hat in rapport publisearre oer de digitaletransformaasjeaginda foar GLAMs.
Wikipedy definiearret digitale transformaasje as ‘it brûken fan nije, fluch en faak feroarjende digitale technology om problemen op te lossen.’
Foar GLAMS ferwiist de term digitaal nei alle ynhâld, tsjinsten, ûnderfinings, gegevens, systemen of technologyen. De kearn fan digitale transformaasje is faak in djipgeande feroaring. It fermogen fan in yndividu of organisaasje om mei dy feroaring om te gean wurdt yn it foarste plak bepaald troch de eigen digitale feardichheden.
Ferskowing nei digitalisearring foar GLAMs
Yn 2020 waard de GLAMsektor yn it digitale djippe smiten. Organisaasjes reagearren, sprongen yn aksje of waarden twongen om oer te stappen op digitaal wurkjen, mei in snelheid fan feroaring dy’t foarhinne ûntinkber west hawwe soe.
Binnen GLAMs is der sprake fan in soad werpublikaasje en werferpakking fan besteande digitale ynhâld, it kreëarjen fan nije ynhâld, en it ferskowen fan live nei online eveneminten, lykas exhibition walkthroughs en online storytelling. Dit hat in soad útdagingen mei him meibrocht wat personielskapasiteit en online wurkjen oanbelanget, en brocht oan it ljocht wat foar in soad organisaasjes al slimme hiaten wiene yn de digitale feardichheden en it selsbetrouwen fan harren teams. Foar in soad GLAMs soe it opbouwen fan digitale kapasiteit yn it foarste plak gean moatte oer it op ‘e oarder krijen fan de basis.
De ôfrûne jierren binne oer de hiele wrâld in breed skala oan stypjende inisjativen en tsjinsten ûntwikkele om digitale kapasiteit yn de GLAM-sektor op te bouwen.
- Yn it Feriene Keninkryk waard yn 2020 Digital Skills for Heritage lansearre. It is makke om de digitale feardichheden en it betrouwen yn de hiele Britske erfguodsektor te fergrutsjen. It bestiet út ûnderskate ûnderdielen fan doelrjochte stipe foar it foldwaan oan it ferlet fan erfguodorganisaasjes fan elk type en op eltse skaal.
- The Digital Culture Network is in Ingelsk inisjatyf ûnder lieding fan Arts Council England, de nasjonale ûntwikkelingsorganisaasje foar kreativiteit en kultuer, dy’t oerheids- en lotterijfinansiering ferdielt. Ingelske kulturele organisaasjes hawwe tagong ta ien-op-ien advys en digitale boarnen fan Tech Champions.
- The Digital Culture Compass is makke yn opdracht fan Arts Council England en it National Lottery Heritage Fund. It is in online toolkit om keunst-, kultuer- en erguodorganisaasjes te stypjen by it yntegrearjen fan digitale technology yn harren wurk. It bestiet út twa eleminten: in hânfêst dat digitale best practices sketst en in tracker wêrmei’t organisaasjes harren oanpak foar digitale technology beoardielje kinne en plannen ûntwikkelje kinne foar takomstich wurk.
- Yn België rjochtet Digital leadership in the cultural sector him op de winske (of sels needsaaklike) kompetinsjes en ekspertize wat digitaal liederskip oanbelanget yn de fluch feroarjende maatskippij. It biedt in basis om sels digitale transformaasje oan te pakken en te wurkjen oan in digitale strategy. Dat de training spesifyk rjochte is op persoanlike coaching yn de brede kulturele sektor (net allinnich kultureel erfguodorganisaasjes), liedt ta ûnderlinge kennisútwikseling.
- Dêrneist is der it projekt Towards a digital cultural ecosystem. Dit projekt hat it doel in mienskiplike fisy te ymplemintearjen op it mêd fan bestjoer, in ynfrastruktuer- en data-oanpak wêrby’t der sjoen wurdt nei mienskiplike tsjinsten en ferlet, sadat in rûte útset wurde kin om digitale transformaasje fan de kulturele sektor.
- It Europeana report beskriuwt ek multi-partner GLAM-projekten en gearwurkings mei ferskate aspekten fan digitale feardichheden. Besjoch se hjirûnder om harren best practices te ûnderfinen:
- GIFT - in mienskiplik ûndersyksprojekt finansiere troch it Horizon 2020 programma fan de EU. It projekt hat ynternasjonaal renommearre artysten, ûntwerpers, museum professionals en ûndersikers by elkoar brocht om museums te helpen by it meitsjen fan ûnderfiningen dy’t fysyk en digitaal kombinearje, om sa persoanlike moetings mei kultureel erfguod oanbiede te kinnen.
- Meaning Making - in ynteraktive, digitale kursus oer digital storytelling, ûnderbrocht by it Deutsches Museum en laat troch Andrea Geipel en Abhay Adhikari. Dit programma helpt mei praktyske ideeën by it foarmjaan fan it online kulturele oanbod foar it ynformearjen, ûnderwizen en fermeitsjen fan it publyk.
- Smart Places - dit projekt is finansiere troch Creative Europe en hat mear as 55 ferskate aktiviteiten mei in ûnderskiedende digitale keppeling, dy’t besteand en takomstich publyk fan elk dielnimmend ynstitút oansprekke moatte
- Library Carpentry - giet oer it wurkjen oan digitale feardichheden mei in spesifike fokus op bibleteken.
- Digital Arts Service Alliance (DigitalASO / OSANumériques) - finansiere troch Kanada's Digital Strategy Fund, dit is in fiifjierrich projekt oer ferskate sektoaren om de digitale transformaasje fan Kanadeeske keunsttsjinsten troch ûndersyk nei digitale feardigens, training en it bouwen fan alliânsjes en platfoarms fuort te sterkjen.
- GLAM Labs - dizze ynternasjonale GLAM labs mienskip ûntstie yn 2018 yn in wrâldwide ‘Library Labs’ yn it Feriene Keninkryk. It is útgroeid ta in mienskip fan 250 minsken fan mear as 60 organisaasjes yn mear as 30 lannen.
Aksjeplan
De kaai foar in suksesfolle útwikselingsaktiviteit is in goeie planning. It is wichtich om nei te tinken oer wêrom’t je in útwikseling wolle en foar wa’t je dat dwaan wolle, foardat je neitinke oer de wize wêrop’t je dat dwaan sille. Yn de ideale situaasje soe al neitocht wurde oer it belûken fan it publyk by t ûntwerp fan de aktiviteit, of’t dat no ûndersyk of edukaasje is. De publike belutsenens moat de kwaliteit of de ympakt fan it ûndersyk of de edukaasje fegrutsje.
Wêrom?
De earste fraach om oer nei te tinken by it organisearjen fan in aktiviteit is wêrom’t je it publyk belûke wolle.
Der binne trije haadredenen foar it organisearjen fan sa’n aktiviteit, nammentlik: ynfoarmearje en ynspirearje, oerlizze, of gearwurkje. It dielen fan je kolleksje, it promoatsjen en beskermjen fan de regionale taal en identiteit, en de kombinaasje mei it ûnderwizen fan skoalbern wat digitale feardigens oanbelanget, is allegear ûnderdiel fan it Wikiwomenprojekt. It doel is om gear te wurkjen mei it publyk.
Wa
De twadde oerwaging is: wa wolle je belûke?
Minsken ferskille in soad, kwa ynteresses, foarkarren, eftergrûn, âldens, ekonoamyske omstannichheden, lokaasje en slachte. Wa’tst berikke wolst sil ôfhingje fan dyn ûndersyk of kolleksje en fan de redenen foar it belûken fan it publyk.
De Wikiwomenaktiviteiten hawwe in spesifike demografy foar eagen. Hoewol’t de doelgroep in mjuks wêze kin, is it wichtich om út te splitsen wa’t ûnderdiel útmakket fan de doelgroep. Bygelyks, de doelgroep bestiet út meartalige skoallen fan it fuortset ûnderwiis en de learlingen yn twatalige regio’s.
Hoe?
As de doelgroep spefisyk definearre is, kin it goed wêze om in partnerskip mei in oare organisaasje oan te gean foar it opsetten fan in útwikseling. In goeie wize is kontakt opnimme mei in taalynstitút of oare GLAMs yn dyn regio om nei te gean oft jimme in mienskiplik evenemint hoste kinne.
- Sykje editors mei ûnderfining
- As je foar it earst in evenemint hoste, is it oan te rieden in Wikipediaan mei ûnderfining yn de earm te nimmen.
- Fyn in list mei Wikimedia Affiliate Groups hjir.
- Fyn in list fan Wikimediabrûker groepen en kontaktdetails hjir.
Promoasjepakket
It Wikiwomenpromoasjepakket is ûntworpen om sichtberens, belutsenens en ynteraksje te ferheegjen. De fêstige Wikiwomenmerkgids soarget foar in harmonieuze en werkenbere identiteit op alle platfoarms en materialen.
It dielen fan dyn evenemint op sosjalemediakanalen kin mear publisiteit jaan oan dyn kolleksje en oan it Wikiwomenprojekt en de doelen. De measte fan de hjoeddeistige organisatoaren brûke X (Twitter), Instagram en Facebook as primêre promoasjekanalen - mar kinst it fansels ek in stap fierderbringe troch in spesjale evenemintspagina oan te meitsjen op Facebook om details en updates te dielen.
GLAMs spylje in trochslachjaande rol yn it Wikiwomenprojekt. Dyn kommunikaasje moat dizze unike posysje ûnderstreekje, lykas de wichtigens fan edukaasje, minderheidstalen en emansipaasje. Brûk hashtags lykas #WikiWomen #Minoritylanguages en oare regionale hashtags, of hashtags dy’t relevant binne foar it evenemint.
- Logorjochtlinen: Brûk it Wikiwomenlogo om de sichtberens en belutsenens te fergrutsjen, en in werkenbere oanwêzigens oer alle platfoarmen te hâlden. Wês der wis fan dat de kleuren en it lettertype fan de logo’s net feroare wurde.
- Kleureskema en typografy: It Wikiwomenmerk hat in ûnderskiedend kleurepalet en typografy dy’t mei elkoar de basis fan de fisuele identiteit foarmje. Wikiwomen brûkt ‘Open Sans Bold’ foar titels en ‘Open Sans Regular’ foar oare text. It kleurskema is mei soarch útkeazen om it merk te fertsjintwurdigjen.
- Ofbyldings: Fisuele eleminten lykas ôfbyldings moatte it sentimint fan Wikiwomen útdrage: emansipaasje, diversiteit en gearwurking. Ikoanen moatte simpel mar betsjuttingsfol wêze en oerienkomme mei it kleurepalet foar konsistinsje.
Evaluaasje
De lêste stap fan in plan is it oerwaagjen fan in evaluaasje. Brûk hjirfoar de earste stap: Wêrom’t je in aktiviteit organisearje. Is dyn wêrom berikt? As je neitinke oer wat je evaluearje wolle, tink dan ek oer wizen om de ympakt fan in aktiviteit te mjitten. Bygelyks troch (in diel fan it) publyk te befreegjen nei in feroaring dy’t mooglik plakfûn hat troch de aktiviteit. Reflektearje op de aktiviteit kin ek fanút it eigen perspektyf of troch it befreegjen fan kollega’s. Hjirûnder stean in pear foarbylden fan fragen om te stellen by in evaluaasje oan de hân fan de redenen om in aktiviteit te organisearjen:
Ynformearje en ynspirearje: Is de doelgroep feroare op hokfoar wize dan ek - troch kennis op te dwaan, troch harren hâlding te feroarjen, of harren gedrach?
Oerlizze: Hat de miening fan it publyk laat ta in feroaring, of hat it holpen om de doelen fan it projekt te redefinearjen?
Gearwurkje: Op hokfoar wize hat it gearwurkjen mei it publyk laat ta feroaringen yn hoe’t it projekt oanflein of folbrocht waard?