香港維基社群用戶組/2017至2018年度報告
2017年，香港維基社群用戶組開始籌組。自從前分會香港維基媒體協會解散之後，香港維基人就繼續舉辦活動同開始著手籌組新組織，完成各樣程序，等新組織取得地方自治體委員會承認，以代表同推動香港維基運動。2018年，繼續爾啲工作，包括繼續籌辦活動，而個承認過程亦都幾順暢。本頁係香港維基社群用戶組從一開始到2018年8月31號嘅活動報告。
2017至2018年度報告
用戶組籌組過程
自從2015年香港維基媒體協會（WMHK）開始出現組織問題，就有聲音建議籌組維基媒體用戶組。當時有建議參考巴西模式，將分會轉型做用戶組，不過卒之失敗告終。2017年2月，地方自治體委員會取消咗承認WMHK。然後無耐之後，WMHK亦都解散咗。當時，香港維基人（主要係中文維基參與者）開始討論及著手籌組新維基媒體用戶組。而過程之中，台灣維基媒體協會同中國維基媒體用戶組成員亦都有就點樣恢復返本地社群畀咗唔少意見。用戶組頁面喺WMHK取消咗承認嘅同日建立，而Telegram群組就喺嗰年建立，促進用戶組準成員間嘅交流同溝通。
內部事務
參考過往設立維基媒體用戶組成功同失敗嘅經驗，本組決定著手籌措，取得自治體委員會承認。喺2017年7月一次社群聚會上面，早期準成員間開始咗討論，亦都提出咗要成立用戶組。當時，亦都有討論過用戶組視覺標籤。基於爾啲討論，同年11月經投票決定咗本用戶組個名同圖標。原先爾次投票係採納咗「香港維基用戶組」做組名，但後來2018年8月，就應自治體委員會要求改咗做「香港維基社群用戶組」。而圖標就沿襲自前分會。其他細節，諸如參與門檻同使命，亦都曾經討論過。
2018年3月另一次編輯松無耐之後，就有社群成員動議修改本用戶組個宗旨，貼合返營運需要同香港社會現況。爾個動議2018年3月起草，最後獲得一致通過，可惜遇到有效人數問題。有效人數係「元維基用戶組頁面上簽咗名嘅用戶三份之二以上」，不過當中並無指明應該計算參與率、票數抑或使用共識制，即係點樣解釋個表態結果。6月，本用戶組決定，爾項動議依據共識制獲得通過。爾個結果如以共識制（棄權唔計算為反對）同參與率（討論開始嗰時，本用戶組淨係得十八位成員，而當中十二位已經參與其中）計算，係應該可以滿足到個要求嘅。不過，如以票數來講，就會以九分之一嘅些微差距，無法通過。隨即，1233、Billytanghh及WhisperToMe當選為聯絡員，負責同自治體委員會聯絡同跟進承認過程。
外展活動
2017年7月至2018年6月，本用戶組一共舉辦咗五次活動。當中一次係社群聚會，旨在討論社群事務；三次係編輯教學聚；同埋一次混合聚。
用戶組嘅第一場活動喺2017年7月舉行，有5個人參加，佢哋都係用戶組嘅創組成員。討論嘅話題包括用戶組嘅結構、入組要求、宗旨同埋用戶組嘅標誌（睇返上面）。佢哋亦都交換站內事務，好似關注度問題（對本地普通編輯嚟講係個長期問題）、辨認可靠來源同埋第十五次動員令咁。
2017年11月，搞咗第二次聚會，係維基百科亞洲月編輯松。出席者入面，一半係資深編輯者或者社群推動者，其餘就係新手。喺頭兩個鐘，資深編輯者向新手介紹維基百科嘅方針、基本編輯技巧同埋聯絡其他編輯嘅方法。之後資深編輯者就指導新手寫佢哋自己揀嘅條目。最後，我哋發覺活動同亞洲月無乜關係，而且好少新手返返嚟。不過，點都好，呢次係我哋第一次搞嘅編輯教學。
本組同 亞洲藝術文獻庫同埋M+合作連續舉辦咗兩場編輯教學。由於仲未有Facebook專頁，咁所以都要依賴亞洲藝術文獻庫同埋M+嘅社交媒體網絡去宣傳個聚會。第一場喺2018年2月舉行，由1233負責教學部份。同11月嘅聚會一樣，資深編輯者教新手點樣寫好條目，但係就觀察到個教學過程有啲效率問題。第二次喺3月同香港巴塞爾藝術展2018同步舉行。今次由亞洲藝術文獻庫同埋M+負責教學部份，而本組就負責幫新手。今次就無見到啲咩問題，而亞洲藝術文獻庫同埋M+亦都會遲下改下個教學模式。兩次活動共吸引咗27個人 （包括資深編輯者同埋對維基媒體有興趣嘅女性藝術家）參加。
本年度最後一個活動係喺2018年6月舉行。喺通過修訂宗旨（睇返上面）之後，春卷柯南同埋ネイ分享咗佢哋喺2018年ESEAP會議度學咗啲乜嘢（睇下面）。跟住我哋討論咗點樣復興本地基層社群。我哋同意應該復興返香港維基人佈告板（好似更新返紅鏈同埋設立評估表）同埋加強接觸好似喺公共圖書館流連嘅潛在編輯。WhisperToMe帶埋咗部份學生喺深圳過嚟，所以佢同1233喺舉辦場地嘅另外一邊教佢哋維基百科嘅基本編輯技巧。
其他
- 春卷柯南同ネイ代表WUGHK出席咗印尼巴里2018年ESEAP會議。佢哋返香港之後，喺2018年6月嘅聚會度分享咗佢哋嘅經歷。分享內容分為四個部份：
- 一、會議嘅基本資訊；
- 二、關於社群事務，佢哋同WMF工作人員傾過嘅嘢；
- 三、嚟自同行地區嘅最佳實踐，同埋有啲咩可取之處；同埋
- 四、對下一次會議有咩展望。
- 本組喺2018年4月寄咗九張明信片作為2017年維基百科亞洲月嘅紀念品。呢次用咗一張由Steven Wu影嘅相做封面，而封底就由1233負責設計。喺鄭樂捷先生嘅協助之下，本組同Steven Wu、SuperHamster同Fantasticfears協調咗許可同財政等等問題。