Términos d'usu/Introducción

Tres d'un procesu históricu d'edición y comentarios de la comunidá, los Términos d'Usu de Wikimedia anováronse. La versión revisada de recién sedrá efeutiva'l 25 de mayu de 2012.

Los Términos d'Usu anovaos son les resultes d'un procesu collaborativu únicu qu'incluyó más de 200 ediciones y 4500 llinies d'alderique. Per espaciu de más de 140 díes, la comunidá de Wikimedia revisó, redautó y corrixó los anovamientos propuestos pa los Términos d'Usu, resolviendo más de 120 asuntos. Nunca enantes se redautaran los términos d'un sitiu web importante per aciu d'un esfuerciu interactivu y de collaboración tan grande. El procesu comunitariu de comentarios y revisiones pa los términos anovaos finó'l 31 de payares de 2011. La Xunta Direutiva aprobó formalmente'l borrador de los términos anovaos el 6 de marzu de 2012. Ente otres coses, estos términos disponen:

• Meyor comprensión: L'alcuerdu anováu inclúi una plantía resume fácil de lleer p'ayudar a facilitar la comprensión de los términos.
• Mayor seguridá: Los términos anovaos prohiben dél númberu d'aiciones (como instalación de software maliciosu) que podríen comprometer los sistemes de Wikimedia. Magar qu'estes restricciones nun representen un cambéu na política, furnen claridá no tocante a un comportamientu inaceutable.
• Funciones más nidies: En rempuesta a les solicitúes d'orientación, l'alcuerdu anováu clarifica les funciones y responsabilidaes de la comunidá, incluyendo a editores y collaboradores. Estos términos tamién pretenden furnir orientación p'ayudar a los usuarios a nun tener problemes.
• Mayor retroalimentación de la comunidá: L'alcuerdu anováu asegura que los anovamientos futuros van dir asociaos a un procesu d'alderique collaborativu. L'anovamientu da a los usuarios a lo menos un periodu de 30 díes de comentarios enantes de qu'una revisión importante tenga efeutu (cola aprobación de la Xunta). Hai una esceición de 3 díes pa cambios llegales y alministrativos.
• Llicencies llibres más nidies: Acordies con algunos, los TdU anteriores yeren dacuando confusos no tocante a los requisitos de les llicencies llibres. L'alcuerdu anováu fai por esplicar más nidiamente estos requisitos a los editores y collaboradores (ensin camudar les práutiques esistentes).
• Más ferramientes escontra l'acosu, amenaces, acechu, vandalismu y otros asuntos recurrentes: Los términos dexen nidio que talos actos tán prohibíos. Una novedá pa Wikimedia ye que l'alcuerdu anováu afita la posibilidá de bloqueos globales en casu de violaciones graves nes wikis, una necesidá que foi solicitada por ciertu númberu de miembros de la comunidá. Magar que'l bloquéu global ta autorizáu polos términos d'usu, va ser implementáu por polítiques de la comunidá.
• Meyor proteición llegal: Los términos anovaos incorporen seiciones llegales que s'usen davezu p'ayudar a protexer un sitiu como'l de nueso, tales como una meyor esplicación de la nuesa posición como agospiadores, o como exenciones y llimitaciones de responsabilidá pa la Fundación.

Ye abondo dicir que tamos d'alcuerdu con otres organizaciones asemeyaes, qu'incorporaron alcuerdos asemeyaos, incluyendo Internet Archive, Creative Commons, Mozilla Firefox, Open Source Initiative, Project Gutenberg, Linux Foundation, Stack Exchange, WikiSpaces y WordPress.com.

Ensin el trabayu duru y la esperiencia de la nuesa comunidá, esti proyeutu tuviera sío imposible. Celebramos la participación de la comunidá nesta iniciativa innovadora, que resultó nos términos d'usu redautaos de la forma más collaborativa posible de cualesquier sitiu web importante.